Duela hiru jardunaldi ezinezko zirudiena gertuago ikusten dute orain Mondragon Unibertsitatekoek: ligaren aurreneko fasea sailkapenaren erditik gora amaitzea, bigarrenerako onenen multzoan sartzea eta, ondorioz, denboraldi erdirako mailari eustea ziurtatuta edukitzea, alegia. Zapatuan Ardoiri irabazita eta Askartzaren porrotarekin, datorren jardunaldian elkarren artekoa irabazita postu horietan kokatuko litzateke Arrasateko taldea.
Ardoiren aurkakoa uneoro izan zuten kontrolpean MUkoek, eta beti joan ziren aurretik markagailuan, hamar puntutik beherako aldeekin lehen zatian –39 eta 32 atsedenaldian–, baina hamabostetik gorakoekin ere bai bigarrenean –75 eta 60 amaieran–.
Josu Larreategi entrenatzailea gustura geratu zen taldeak defentsan egindako lanarekin: "Lortu dugu zonakakoa erabili gabe, bana-banakoarekin aurkaria 60 puntutan uztea. Beste partidu batzutan baino hobeto ibili gara, nahiz eta ez dugun jarraikortasunik izan gaur ere".
Barruko jokoan tarteka min egin arren, Ardoiko jokalariak ez ziren fin ibili kanpoko jaurtiketetan, eta errebotean ere Arrasatekoak izan ziren nagusi. Erasoan, berriz, boteko jokorik gabe, baloia batera eta bestera azkar mugituz eta blokeo gogorrak eginez jokatu zuten Larreategiren mutilek, eta astean zehar landutakoak emaitza eman zuen. Entrenatzaileak Kintanak, Anasagastik eta Atxak egindako lana nabarmendu zuen.