Mojategin beharrean, Ibarra futbol zelaian entrenatuko da Reala astelehenean, 10:15ean hasita. Eta, Realeko zuzendaritzako kideek ibarreko neska-mutiko guztiak gonbidatu nahi ditu talde txuri-urdinak lan nola egiten duen bertatik bertara jarraitzera. Aproposena, duda barik, bisita hori Gabonetan egitea zen, baina hori ez da posible izan; hala, neska-mutikoek modu ezin hobean hasiko dute ikasturtea.
Mondrarekin adostasunik ez
Hasiera batean Realak Mojategin egin behar zuen lansaio hori, baina Gabonetako opor egunetan. Zaragozako partidua tarteko Realak ezin izan zuen urtarrilaren 3an edo 4an Mojategira etorri, eta bisita hilaren 10ean egiteko proposamenaren aurrean, Mondrako ordezkariek ezetz esan dute. Batetik, gazteendako lehenengo eskola eguna delako, eta bestetik, eurendako ere fetxa txarra delako. Alde horretatik, nahiago dutela aurrerago etortzen badira.
Bestalde, Realeko ordezkariek adierazi digute taldea Mojategira ekartzeko ahalegina egin ostean –Gipuzkoako beste herri batean egin behar zutelako Zubietatik kanpo lehen entrenamendua– ez zutela espero Mondraren partetik jasotako erantzuna. Konponbidea, baina, erraza izan da, Aretxabaletara joatea.
Hala, astelehenean, 10:15ean Realak entrenamendu saioa egingo du Ibarra futbol zelaian.