Hondarribikoa jaiotzez, sei urte zituela etorri zen familiarekin Mauri Zubillaga Gatzagara eta ibarreko pilotako aurpegi ezagunenetakoa bilakatu da urte hauetan guztietan egindako lanagatik. 1976an hasi zen herriko pilota sailean. Orain, Hondarribian bizi da eta entrenatzaile postua lagako du, nahiz eta herriko pilotariak gertutik jarraituko dituen.
Oraindik ere federatu fitxa dauka eta Gatzagako txapelketa antolatzen du. Martxo aldera ekingo diote Gatzagako txapelketaren ekitaldi berri bati. Pilotari askoren maisu izandakoa, Arrasaterekin, besteak beste, 2007an herri arteko Gipuzkoako Txapelketa irabazi zuen Zubillagak. Gaur, esan bezala, herriko pilotazaleen esker ona jasoko du.