Azaroan eta abenduan aritu dira Txatxilipurdikoak ludoteka ezberdinetan jostailuak batzen. Jostailu bakoitzagatik– egoera txarrean daudenak edo sexu bereizketa edo indarkeriaren aldeko jarrerak erakusten dituzten jostailuak ez dituzte onartu– txartel bana banatu dute, eta txartel hori gero jostailuengatik trukatu ahalko da azokan. Okendoko ludotekan jarriko dute merkatua, 10:00etatik 14:00etara.
Hala, Arantza Osoro Txatxilipurdiko dinamizatzaileak adierazi duenez, lehen orduan izango da "eskaintza zabalena". Izan ere, badago non aukeratu: denetariko 149 jostailu izango dira. Eskaintza zabalena gura duenak goiz ibili beharko da, beraz.
"Ahalik eta truke gehien"
Haur eta gurasoak animatu ditu Osorok, txartelak alperrik ez galtzeko: "Ahalik eta truke gehien egitea espero dugu, eta haurrek eurek aukeratutako gustuko jostailua eramatea". Soberan geratzen direnak Gurutze Gorrira bidaliko dituzte.