Norgehiagoka hasi bezain pronto erakutsi zuen Elgoibarrek bere nagusitasuna, eta kontraerasoan aldea ateratzen hasi zen, etxekoek defentsan egin zituzten akatsei esker. Erasoan ere ez ziren ondo ibili Migel Angel Salterainen mutilak, eta horri esker, atsedenaldira 11 goleko aldearekin iritsi ziren kanpotarrak (15-26).
Bigarren zatian gauzak ez ziren larregi aldatu. Elgoibartarrak ederto ibili ziren kontraerasoan, eta golak bata bestearen atzetik sartu zituzten. Azkenean, 30-48 emaitzarekin bukatu zen lehia. Esan beharra dago, dena dela, erasoan ondo baina defentsan ez zirela oso fin ibili aurkariak; 30 gol sartu zizkioten-eta Arrasateko mutilek.
Ford Mugarri liderraren kontra
Bestalde, asteon atseden izan ostean, datorren astean partiduak itzuliko dira Euskadiko txapelketara. Sailkapenean bigarren dagoen Ford Mugarrik norgehiagoka garrantzitsua jokatuko du liderraren kontra, kanpoan. Soraluzek, berriz, Romo Indupime hartuko du etxean.