Horren harira, salatu egin zuten Ikasle Abertzaleak eta Gazte Independentistak taldeetako kideen atxiloketak. Diote talde biak direla Gernikako Ituneko parte. Salatu dute, baita ere, pertsona horiek “jasan duten inkomunikazio egoera” horrek “torturak eta tratu txarrak errazten dituelako”. Eta besteak beste, herritarrei dei egiten diete “egoera salatzeko deitu diren mobilizazioetan parte har dezaten”.
Mozioa onartu egin zuten, PSE-EEren eta PPren kontrako botoekin, baina gainerako guztien aldeko botoekin.
Aritz Arrieta bozeramaile sozialistaren esanetan, atxilotuen aldeko puntuekin Segiko kideak babestu gura dituzte, eta nabarmendu zuen Alderdien Legea nazioarteko epaitegiek babestutakoa dela eta besteak beste, ETAk su-etena deklaratu duela gero hura apurtzeko.
EAJren kexatxoa
Bestalde, EAJk mozioaren alde bozkatu bazuen ere, Rafael Uribarrenek "kexatxoa" helarazi gura izan zien mozioa sinatu dutenei. Jeltzaleak adierazi zuen edukiarekin ados egonda, ez dutela jaso gonbiterik mozioa eurek ere sinatzeko.