Horrekin batera, Iturbide egoitzatik Zerkaostetara igotzeko dauden eskaileretan eta aldapan ere egingo dituzte obrak: "Orain dauden eskailerak oso estuak dira, zabalagoak ipiniko dituzte; eta aldapak, berriz, ez ditu betetzen irisgarritasun arauak; beraz, egokitu egingo dute", azaldu du Obra Saileko arduradun Moises Altuna teknikariak.
Era berean, biribilgune txikitxo bat dabiltza egiten Biteri plazatik gertu: "Biztanleen Arreta Zerbitzuaren ondoko garajeetakoek noranzkoa alda ahal izateko da hori", azaldu du Obra teknikari Izaro Agirrek.
Izan ere, Zerkaostetako obrak bukatzen dituztenean, kale horrek orain arte izan duenaren kontrako noranzkoa izango du: Biteritik Iturbide egoitzara joan ahal izango da automobilarekin.
Lehen zatia bukatuta
Obra osoaren lehenengo zatia bukatuta dago: San Viator eskolaren kanpoko aldetik Kontzezinorainoko kale zatiari dagozkion obrak. Azpiegiturak berritzeaz gainera, bestelakoen artean, lur azpiko edukiontziak ipini dituzte egoitzaren ondoan.