Udaletxea itxita izango den arren, hori bai, Udaltzaingoak egunero egingo du lan, 24 orduko zerbitzuarekin.
Kirol zerbitzuei begiratzen badiegu, berriz, Musakolako kiroldegitik aditzera eman dute kiroldegia egunero izango dela zabalik, 08:30etik 14:00ak arte. Zapatuan, berriz, ordutegi zabalagoa izango dute: 08:30etik 20:30era.
Uarkape eta Iturripe
Uarkape frontoiari dagokionez, berriz, datozen bost egunotan itxita izango da. Eta Pazko astean martitzenetik egubakoitzera zabalduko dute goizeko 10:00etatik gaueko 22:30era. Zapatuan, 10:00etatik 20:00etara eta hurrengo domekan, hau da, apirilaren 19an itxita izango da.
Kirol zerbitzuekin bukatzeko, Iturripen ere ordutegi berezia dute datozen egunotara begira: datozen bost egunotan itxita izango da eta gero, Pazko astean, 16:00etatik 21:00etara zabalduko dute, zapatuan izan ezik; zapatuan 08:30etik 13:30era zabalduko dute.
Urbanorik ez
Eta Aste Santuko jaiegunek eragina izango dute, baita ere, herri barruko autobusaren funtzionamenduan. Zerbitzu Sailetik aditzera emandakoaren arabera, zapatuan izan ezik, gainerako lau jaiegunetan ez da zerbitzurik izango. Zapatuan, berriz, 08:00etan barik, 09:00etan hasiko da urbanoa eta 21:00ak arte jardungo du.