Zeren gainekoak izango diren ezin da esan, jakina, sekretuak hala agintzen duelako. Baina bai kontatu dutena da hamar karroza aterako direla bihar gaztetxetik kalera. "Jende piloa gabiltza lanean, 50 lagunetik gora. Gainera, gazteekin batera, nagusitxoagoak ere badabiltza", kontatu du Jon Ugartek, Aratuste Komisiñoko ordezkariak. Datu horiek guztiak eskuartean, beraz, pentsatzekoa da giroa, behintzat, ez dela faltako zapatu erregularrean.
Egitarau orokorrari dagokionez, erraldoi eta kilikiak eta mozorro tailerrak izango dira bihar 11:30ean hasi eta pregoia irakurri bitartean. 12:30ean irakurriko dute pregoia, Biterin, iaz mozorro onenaren saria irabazi zuen koadrilak, bestela esanda Sardina irabazi zuenak: Txorromoski koadrilak.
Kalejira erraldoia
Eta pregoiaren ostean egin dute hitzordua herri bazkarian parte hartuko dutenek, herri bazkarirako "motorrak berotzeko". Jon Ugartek jakinarazitakoaren arabera, Gasolineratik aterata, honako ibilbidea egingo dute: Gasolinera-Laubide-Maalako biribilgunea-Maala kalea-Seber Altube-Okorotegi-Arbolapeta (errepidetik, kontrako noranzkoan)-Olarte eta Uarkape (14:30ean da bazkaria).
Sariak eta jolasak, bazkal ostean
Bazkariaz gainera, bazkaloste polita izango dela ere azpimarratu du Ugartek: "Bazkaldu, mahaiak batu eta jolasak egingo ditugu; horiek ere puntuagarriak izango dira geroko sari banaketarako", argitu du. Izan ere, iaz bazkal ostea eta mozorroen sari banaketa artean gertatu zen hutsunerik izan ez dadin, bazkal ostean banatuko dituzte aurtengo hiru sariak: koadrila, karroza eta taberna onenei (31 tabernak parte hartuko dute). Beraz, zera esatea besterik ez da falta: bihar, Mozorrotu ala hil!
Egitaraua
21, zapatua
11:30 Erraldoi eta kilikiak
12:00 Mozorro tailerrak, Biterin
12:30 Pregoia, Biterin
14:30 Bazkari herrikoia
19:30 Dantzaldia: Trakets taldea
22, domeka
19:30 Nancho Novoren Sobre Flores y Cerdos antzezlana.
24, martitzena
16:30 Mozorro desfilea, plazan
17:00 Hipo eta Tomax pailazoak
17:30 Samasiku txaranga
18:00 Kalejira Funky L'Olla taldearekin
19:00 Arrasate Musikaleko banda eta balletarekin kalejira
20:00-21:30 Egan taldearekin dantzaldia
22:30 Egan taldearekin dantzaldia
23:30 Sardinaren hileta; Segizioak erialdeko kaleak ibili ondoren Herriko Plazan bukatuko du desfilea, sardina bertan erretzeko.