Bestalde, nabarmentzekoa da, baita ere, San Josepe harrobia behin betiko itxi eta haren jarduera bertan behera lagatzeko puntua landuko dutela.
Hirigintza Sailetik emandako xehetasunen arabera, batetik, harrobia behin betiko itxi egingo dutela jakinaraziko diote Jaurlaritzako Meatzaritza Sailari. Bestetik, ingurua berreskuratzeko lanek aurrera egingo dute. Hau da, inguru hura txukun uzteko lanekin segituko dute, eta gero Arrasateko Udalaren esku geratuko da han zer egin erabakitzea.
San Joseperako bi aukera: industrialdea
Bi aukera ditu Udalak. Batetik, San Joseperako lehenagotik dagoen plan partzialean jasotakoa gauzatu. Hau da, industrialdea eraiki. Besteak beste, gaur egun San Josepen dagoen hormigoi planta hantxe geratuko da eta gero industrialde berrian txertatuko lukete.
Ideia lehiaketakoa gauzatu
Beste aukera da Udalak antolatutako ideia lehiaketara aurkeztutako proiekturen bat edo proiektu horietako zatiren bat gauzatu. Edozelan ere, eta bigarren aukera horrek aurrera egin bitartean, San Josepen dagoen hormigoi plantak dagoenetan segituko luke.
Ehorzleen lan poltsa
Bestalde, lan eskaintza bat ere landuko dute udal agintariek gaur arratsaldean: ehorzleen lan poltsa osatu beharra daukate eta hautaketa prozesurako oinarriak onartu beharko dituzte. Horrekin batera, bake epailearen ordezkoa aukeratzeko prozesura hastea ere erabakiko dute.
Bedoña eta San Andresko jaiak
Kultura kontuetara pasatuz, bi auzotako jaiak antolatzeko eskaeren proposamena aztertuko dute: Bedoñako jaiak eta San Andresko jaiak. Santamasak eta Gabonak ere berbagai izango dituzte, jaiegun horietan Arrasaten barrakak ipintzeko jasotako eskaerak aztertuko dituztelako.
Bestalde, hiru musika taldek egindako eskaerak ere aztertuko dituzte: Ozen, Arkada Sozial eta Last Rebels musika taldeek grabaketetarako dirulaguntza eskatu diote-eta, Udalari.
Dragoi berria
Eta Kulturarekin bukatzeko, ez ohiko eskaera bat ere egin diote udal gobernuari: Arrasateko ikurretako bat den dragoiarekin lotuta, Errementari dantzarako dragoi berria egiteko eskaera.