Zabor tasa %14 igoko da, San Markos zabortegia itxi egingo dutelako

Datorren urteko zergen igoera zenbatekoa izango den aztertu eta onartu zuen Udalak egubakoitzeko osoko bilkuran. Eztabaida txikia izan zuten alderdiek puntu hori lantzeko orduan. Ezker Batuak emendakina aurkeztu ere egin zuen. Azkenean, udalbatzarrak aho batez onartu zuen puntu hori. Hori horrela, 2008ko urtarriletik aurrera, orokorrean %2,7 igoko dira Arrasateko zergak.
Edozelan ere, bi salbuespen izango dira, uraren eta zaborren zergekin lotutakoak. Hain justu ere, ur-tasa %5 igoko da, eta zaborren tasa, berriz, %14.

San Markosko zabortegia

Alkateak azaldu zuen moduan, kanpotik ezarrita datoz bi igoera horiek: Zaborraren Partzuergotik eta Uren Partzuergotik.
Zaborren kasuan, San Markos zabortegiaren itxieraren ondorioz aplikatuko dute Arrasaten %14ko igoera. Hala azaldu du Ino Galparsorok, Arrasateko alkateak: "Komunikabideen eraginez, denondako da ezaguna aurten San Markos itxi egin behar dutela. Bada, horren ondorioz,  zaborra guk eramaten dugun zabortegi berera (Sasietara) eraman behar dute, eta kostuak asko igoko dira. Dena den, gai horren harira, esan gurako nuke gai benetan serio eta garrantzitsua dela zer egin horrenbeste zabor ez produzitzeko".
Kopurutan begiratuta, etxeko zabor bilketarengatik ordaindu beharko da 36,04 euro sei hilero; iaz baino bost euro gehiago, gutxi gorabehera.

Uraren kasuan, berriz, Gipuzkoako Uren Partzuergoak %5eko igoera ezarri du.

Hori ere kopurutan begiratzen badugu, uraren zerbitzua izateagatik, ur kontagailuen araberako prezioa kobratuko dute. Normalena izaten da etxeetan 15 milimetroko kalibredun kontagailua izatea. Bada, horregatik, datorren urtean 18 euro ordaindu beharko dugu. Horri gehitu behar zaio kontsumoaren araberako tarifa. Hori horrela, 50 m3- ra arteko kontsumoarengatik 0,45 euro m3 bakoitzeko tarifa izango da; eta 500 metro kubikoko kontsumoarengatik, 0,89 euro m3-ko tarifa.

Kolektore eta halakoen obren eraginez izango da %5ekoigoera, alkatearen esanetan: "Ia bukatzen ari diren saneamendu sistemak eragina izango du prezioen igoeran, kolektore, araztegi
eta horrelakoek. Dena den, geroago eta urriagoa den ondasuna
da ura. Hori horrela, etorkizunera begira, aztertu beharko dugu
sistema eraginkorragoa ipintzea gutxien gastatzen dutenak saritzeko".

Beste salbuespen bat

Zerga kontuekin bukatzeko, aipatu behar da beste salbuespen bat ere izango dela 2008an. Hain zuzen ere, jarduera ekonomikoen gaineko zerga %5ekoa izango da. Kontua da zerga hori ordaintzen dutenek izaten dutela urtero bi milioi eurotik gorako fakturazioa; eta iaz ere aplikatu zuten zerga orokorretakoa baino igoera handiagoa. Horrela, aurten bide beretik segitzea erabaki du Udalak.

Eraikuntza, instalazio eta obren gaineko zergari dagokionez, berriz, horrek ez du igoerarik izango. Arrasateko Udalak kobratu daitekeen topea kobratzen du dagoeneko, beraz, ezin dute gehiago igo.

EAJ-n, zinegotzi berria

Bestelakoen artean, politika kontuak ere landu zituzten. Izan ere, EAJko zinegotzi Jose Ramon Uribarrenek uko egingo zion bere karguari bateraezintasun egoera dela-eta. Uribarren udal langilea ere bada, eta legeak galarazi egiten du zinegotzi batek funtzionario kargua betetzea. Horrela, egubakoitzeko batzarrean jakinarazi zuten Uribarrenen lekua hartuko duela Maria Luisa Larrañagak, EAJren zerrendan Uribarrenen hurrengo doanak.

Datorren urteko hainbat prezio

Turismoak
9 HPtik behera    38,33 EUR
9-11,99 HP    76,66 EUR
12-13,99 HP    127,77 EUR

Hilerria
Panteoiak     9.000 EUR
Nitxoak     641 EUR
Errausketa    246,50 EUR
Beilatokia     60 EUR
Auzoetan ehorztea    116,30 EUR

Aukea   
Abonua (igerilek.)    110 EUR
Abonu familiarra    172,35 EUR
Abonua (kiroldeg.)    110 EUR
Abonua familiarra    172,35 EUR
Abonu plusa    164,95 EUR
Kiroldegiko kantxa    30,85 EUR
Tenisa    4,15 EUR
Rokodromoa/skate    Doan

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.