Zerrajerara joanez gero, dezenteko aldaketa igarriko dugu han egiten dabiltzan obretan, izan ere, abuztuko oporraldian asko aurreratu dituzte hango diharduten urbanizazio lanak. Hala, aurreikusitako data baino lehen amaituko dituzte, urte bukaerarako.
Jolasparke bi eta bidegorria
Jolasparke bi (La Caixako etxeen parekoen antzerakoak) ere ipiniko dituzte inguru hartan, dagoeneko horretarako orubeak gertu dituzte. Eta auzoaren goiko partean (saihesbidearen azpitik) bidegorria eraiki dute, Zerrajera zeharkatzen duena. Bidegorria ere oso itxuratuta dago; erremateak egiten dabiltza orain.
Horiek lan guztia egiteko hasierako aurrekontua 5.200.000 euro pasatxokoa zen, baina hainbat aldaketen ondorioz, handitu egin behar izan dute aurrekontua, 5.880.817 euroraino.
Babes ofizialeko etxebizitzak
Obegisa enpresa gipuzkoarra dabil Zerrajerako urbanizazio lanak egiten. Ingurua txukuntzeaz gainera, etorkizunean inguru hartan aurreikusitako etxebizitzetarako azpiegiturak ere sartu dituzte: argindarra, ura eta beste.
Izan ere, babes ofizialeko 360 bat etxebizitza eraiki behar dituzte han. Visesak, Eusko Jaurlaritzako erakundeak dauka promozio horren ardura. Anbulatorioaren atzeko aldean eraikiko dituzte etxebizitza horiek, bi bloketan.
Kutsatutako lurren garbiketa
Baina, etxebizitzak eraikitzen hasi aurretik, lehenagoko fabrikek kutsatutako lurrak garbitu behar dituzte. Badihardute lan hori egiten eta obra horren arduradunak jakinarazitakoaren arabera, oraingo hilabete honen amaierarako bukatuko dituzte garbiketa lan guztiak. 1.600.000 euro pasatxo, eta hiru hilabete kostatuko da lur horiek garbitzea.