Eskoriatzako Frixi enpresak egingo ditu lanok, 236.000 euro pasatxoko aurrekontuarekin. Hiruzpalau hilabetean bukatuko dituztela esan dute.
Aski ezaguna da Kontzezinoko tuneleko txiza usaina eta bizilagun asko labaindu izan da eskaileretako uso kakekin.
Orain arteko arazoa izan da ingurua garbitzea ez zela erraza, garbitzaileek ezin zituztelako mangerak erabili, garajeetara ura sartzen zelako.
Urteetan egoera bera sufritzen egon ostean, Kontzezinoko bizilagunek lortu dute egin beharrekoaren gaineko adostasuna, eta esandako moduan, asteon hasi dira hori gauzatzen. Izan ere, Kontzezinoko tunelak, nahiz eta pasabide publikoa izan, izaera pribatua dauka, hau da, hango etxeetako bizilagunen ardura da eta eurak arduratuko dira (Udalaren laguntzatxo batekin) obren gastuaz.