Gipuzkoako Herri Arteko txapela jantzita, Arrasateko pilotariak Euskal Herriko kanporaketan dabiltza buru belarri, gainontzeko lurraldeetako onenekin lehian. Hala, Mauri Zubillagaren mutilek gaur jokatuko dute Uarkapen itzuliko partidua (19:30).
Joan den asteko partiduan Berrizen 2-1 galduta, Arrasatekoek –seniorrek, batez ere– gogotik egin beharko dute lan kontrarioa menderatzeko. Arrasateko entrenatzaileak ondo daki hori: "Berrizeko atzelari Zabala oso ona da. Hala ere, posible da markagailuari buelta ematea; horretarako, baina, partiduan zehar lan handiagoa egin behar dugu, ezin gara tanto bakoitza azkar bukatzeko deseatzen egon, orduan pilota guztiak zabalera edo txapa azpira joaten dira-eta".
Hala, Uribarrenek eta Axpek gaurko partiduan entrenatzailearen aginduak zorrotz jarraitzen badituzte, Zubillagak 100 euroko saria agindu die, bere poltsikotik: "Baina kasu egin behar didate, Axpe odolbero bat da-eta". Bestalde, kadete eta gazte mailako bikoteetan aldaketak egingo ditu Zubillagak, kontrarioari ezustean harrapatu asmoz.