AHT proiektuaren aurka agertu dira Eusko Abertzale Ekintza, Ezker Batua-Zutik eta Aralar. Alderdi Sozialistak eta Eusko Alderdi Jeltzaleak Abiadura Handiko Trenaren aldeko botoa eman dute eta Eusko Alkartasuna, berriz, abstenitu egin da. Bozketa amaitu ostean AHT Elkarlana plataformak eskatu du hitza Abiadura Handiko Trenak ingurugiroan sekulako txikizioa ekarriko duela salatuz eta proiektuaren amaiera eskatuz.
Ingurugiroan eta lehenengo sektorean AHTak egingo dituen kalteak eta informazio falta izan dira proiektuaren aurka agertu direnek erabilitako argudioak.
Alderdi Sozialistako kideek uste dute, ordea, Abiadura Handiko Trenak onura asko ekarriko dituela bai Euskal Herri mailan eta baita Espainia mailan ere. Eusko Alderdi Jeltzalea ere AHTaren alde agertu da, beti ere ustez beharrezkoak diren zuzenketak kontuan hartuta.
Hori horrela, bigarren bozketari dagokionean alderdi sozialista izan da kontrako botoa eman duen bakarra. Hau da Arrasateko Udalak proiektuarekiko dituen desadostasunak jasotzen dituen txostenaren aurkako botoa eman du eta kasu honetan Eusko Alderdi Jeltzaleak eta Eusko Alkartasunak alegazioak aurkeztearen aldeko botoa eman dute.
Eguerdiko ordu biak baino lehen aurkeztu beharko ditu Arrasateko Udalak gaur osoko bilkurak gehiengoz onartutako alegazioak.