Gili-Gili dendako Sulima Karabiasek kontatu zuen salmenta handienak uztaila hasieran egin bazituzten ere, azkeneko egunera arte ibili dela jendea mauka bila. Ofizialki beherapenak amaituta badaude ere, udako azkeneko jantziak, astebetez oraindik salgai izango dituzte. Iritzi berekoa da Luko dendako Mari Fran Alonso; hark dio, sasoia joan den moduan joan direla beherapenak, etxafuego handirik bota gabe, baina laburbilduz, ondo.
Udakoak apaletatik kentzen ari diren moduan, udazken-negukoak ateratzen ari dira orain dendetan. Erosleak gainera hasi omen dira erosten. Sulima Karabiasek aurreratu zuen Gili-Gili dendara momentuz, besteak beste, soinekoak, larruzkoak zein artilezkoak, txamarrak eta fraka pitiloak ekarri dituztela. Koloreei dagokionez, udazkenaren ikurrak diren beigea, grisa edo granatea. Luko dendako Mari Fran Alonsok, aurten ere beltza, grisa eta marroia direla jaun eta jabe adierazi zuen. Horiek dira antza, erosleak gustuen dituenak edo jende gehienari ondoen ematen dien koloreak. Osagarri ugari ere jaso dituztela esan zigun; horiek kolore biziagokoak jaso dituztela.