Uda gurean pasako duten ume sahararrei harrera egin diete Arrasaten

Badira aste batzuk Saharako umeak gurera iritsi zirela. Guztira hamaika gaztetxo etorri dira Debagoienera: bederatzi Arrasatera eta bi Bergara eta Antzuolara. Bada, gaztetxoei harrera egin zieten atzo Arrasateko Udaletxean. Ino Galparsoro alkateak eta Oihana Aranburu zinegotziak ongi-etorria eman zieten arrasatearren izenean Udaletxeko areto nagusian. Galparsorok batez ere familiak zoriondu zituen, "ausartak izan direlako".

Aurten zazpi familiak esku hartu dute Oporrak bakean programan; horietatik bi familia, gainera, berriak dira. Agurne Juldain Nubi elkarteko arduradunak familia berriak izatearen garrantzia azaldu du: "Datorren urtean lau ume ez dira etorriko, euren zikloa bete dutelako. Hortaz, seguru asko familia horiek ez dituzte ume berriak hartuko. Hala, familia berrien beharrean egongo gara".

Mediku azterketak egin

Familiek haurrekiko duten betebeharra da, besteak beste, azterketa medikuak egitea. Gainera, udako egun hauetan Saharako berotik urrun egotea da umeak gurera etortzearen arrazoietako bat; baita, elikadura zaintzea ere: frutak eta yogurrak jatea, adibidez. Irailaren 9ra arte egongo dira gurean.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.