Apirilean jausi zen leihoa, eguerdi partean, ezustean. Hori bai, zorionez inor ez zuen harrapatu azpian.
Kontuak kontu, horren ostean Udala konturatu zen Uarkaperen fatxadako hainbat beira ez daudela egoera onean; tokiren batean pitzaduraren bat zein beste aurkitu dute; ikusi dute, baita ere, urteekin beirek lasaierak hartu dituztela, eta apurtxo bat mugitu egin direla. Eta badago beste leiho bat harrikada batekin ukituta dagoena.
Leihoetan pieza bereziak, eusteko
Horregatik guztiarengatik erabaki du Udalak fatxadaren egoera aztertu beharra dagoela. Proposamena da Tecnalia taldeko enpresa bati ematea azterlan hori; hala eginez gero, bi hilabete eta erdian entregatu beharko du emaitza, abuztuko oporren ostean, beraz. Bien bitartean, baina, eta arriskua saiheste aldera, Uarkaperen leihoetan pieza bereziak ipini dituzte, eutsi eta jausi ez daitezen.
Leiho handiak eta 11 urte
Leiho handiak dira Uarkapek dituenak: hiru metro zabal eta metro inguru altu. Frontoiak berak, berriz, dagoeneko hamaika urte ditu. 1999an inauguratu zuten, Santamasetan. Construcciones Amenabar enpresak eraiki zuen.