Txikitxu-Arrostaitz dantza taldeen urteurrenetako azken jaia, urriaren 23an

Uarkape pilotalekuan batuko dira Txikitxu eta Arrostaitz dantza taldeen 40 eta 20 urteak ospatzeko. Dantza erakustaldia egongo da eta gero, afari herrikoia. Izan ere, dantzariek herri osoa gonbidatu dute euren festarako. Afarirako txartelak 25 eurotan daude salgai dagoeneko, Basati eta Kajoi tabernetan.

Oinak dantzan deitu duten ekimenean, Txikitxu eta Arrostaitz dantza taldeek aurten 40 eta 20 urte beteko dituztela ospatzeko hainbat ekitaldi egin dituzte. Bada, azken jaia urriaren 23an egingo dute, Uarkapen. Dantza erakustaldi batekin –nola, bestela– ospatuko dute egun berezia: 18:00etan hasiko da eta Txikitxu-Arrostaitzeko dantzari eta txistulariez gain, gaiteroek, Arrasate Musikaleko kideek, Udalaxpe taldeko txistulariek eta Erraldoi eta kilikien konpartsak hartuko dute parte.

Amaitzeko, afari herrikoia
Erakustaldiaren ostean afari herrikoia egingo dute pilotalekuan bertan. Marga Merkader dantza taldeko arduradunak adierazi du herri osoa dagoela gonbidatuta, erakustaldirako zein afarirako. Txartelak 25 eurotan daude salgai eguaztenetik, Basati eta Kajoi tabernetan.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.