Txatxilipurdiren udalekuak ez dira ezezagunak gurean; ez daroate alferrik "22 urtez aisialdi hezitzailea eta euskara uztartzen". Urteek emandako esperientzia zabal horrekin, aurten ere, adin guztietarako eskaintza osatu dute udaleku ireki zein itxietan.
Udaleku irekiak
Arrasaten bertan, 2tik 10 urtera bitartean ekainaren 28tik uztailaren 23ra arte. Hiru gune egongo dira, adinaren arabera. Aurten astebete gehiago iraungo dute eta zaintza zerbitzua ere eskainiko dute Txatxilipurdikoek (9:00 - 10:00) hiru taldetan:
- Bilin-boloka: 2007an jaiotako haurrentzat, San Andresen.
- Beibilekuak: 2004-2006 bitartekoentzat, Musakolan.
- Bihurrikeixetan: 2000-2003, erdigunean.
Izenematea zabalik dago maiatzaren 7ra arte. Deskontuak izango dituzte familia ugariek eta Topakide txartelaren onuradunek (%5). Eskuorriak Pablo Uranga 6an dituzten bulegoetara eraman behar dira.
Udaleku itxiak
10-12 eta 14-16 urte bitartekoentzat Askizu eta Kosta ala kosta eskualdeko udalekuak antolatu dituzte Jardun eta Loramendi elkarteekin batera. Horrez gain, era berean, Txatxilipurdik urteroko Orioko udalekuak antolatu ditu, 40 lagunendako txanda birekin: uztailak 2-12 eta 12tik 22ra. 250 euroko prezioa dute udaleku hauek eta izenematea zabalik dago aurretik aipatutako deskontuekin.