Ibarretik kanpokoen artean, berriz, Oldberri erakundeko ordezkaritza izango da Arrasaten, bigarren eskuko jantziak batu, berritu eta atzera ere salgai ipintzeaz arduratzen den Caritaseko ordezkariak, alegia. Eta horiekin batera, Nagusilaneko ordezkariek ere parte hartuko dute Elkartasun Egunean, "Gipuzkoan bazterkeria jasaten dutenen alde lan egiten duten erakunderen bat gonbidatu gura izan dugu", azaldu du Eusebio Arexolaleiba Harremaneko kideak.
Bestela esanda, zapatuan, Saharako tea, Kolonbiako txokolatea eta, adibidez, Afrikako kafea dastatu edo erosteko aukera eskainiko dute Seber Altube plazan, 10:00etan hasi eta 20:00ak bitartean. Hau da, bidezko merkataritzan oinarritutako produktuak. Eta horien artean, Iturbide egoitzako nagusiek egindako eskulanak izango dira salgai, eurek hala eskatuta, garapen bidean dauden herriei laguntzeko.
Tonbola, 10:00etatik
Horrez gain, tonbola ere ipiniko dute, "4.000 txartel atera ditugu; ea guztiak saltzen ditugun", dio Arexolaleibak. Dirua Ankurreko (India) umezurtz-etxera bideratuko dute. Tonbolan Ibai Arteko dendarien produktuak zozkatuko dituzte eta jakina, "20:30ean egingo dugu azkeneko zozketa, Eroski Bidaiaken sari berezia".
Bestalde, gaztetxoei begira, 11:00etan Txatxilipurdikoekin jolasak antolatu dituzte; 17:30etik 19:00ak arte Txan magoak saioa egingo die eta egun osoan, Arizmendiko DBHkoek Euro Elkartasuna ekimena egingo dute.