Ordubete iraun duen ekitaldian ez da zuzeneko musika falta izan. Musikaz gain, denetariko bideoak –bi pantaila jarri dituzte aretoan– izan dira ikusgai, hitza hartu duen bakoitzaren arabera pestatutako bideoak, hain zuzen. Hitza hartu dutenen artean izan dira, besteak beste, Agustin Markaide Mondragon taldeko kongresuko presidentea, Jose Antonio Ajuria TU Lankideko erredakzio kontseiluko presidentea eta Javier Marcos aldizkariko zuzendaria.
Gainera, aldizkariaren 50. urteurreneko ekitaldian Juan Leibar lehen zuzendaria –Jose Maria Arizmendiarrietaren laguntzaile sutsu eta 1980ra arte zuzendari– omendu dute. Bestalde, iraileko alea ere banatu dute, 559. zenbakia, 50. urteurrenaren harira atera duten ale berezia.
50 urte, eta helburu berberak
Marcosek adierazi duenez, hasierako eta egungo helburuak ez dira aldatu. Hau da, kooperatibismoa indartu eta hedatzea eta Mondragon taldearen barruan dauden kooperatiben gaineko informazioa kooperatibistei helaraztea dira helburuak oraindik ere. Hori bai, etorkizuna "erronkez josita" datorrela eman du aditzera aldizkariaren zuzendariak, eta teknologia berrien eta batez ere internet-en iraultza izan du hizpide.
Ezin da ahaztu TU (Trabajo y Unión) lankidek hilero ia 12.000 ale banatzen dituela, gurean zein nazioartean. Bada, azken aleko –559. zenbakia da– azalak dioenez, "50 urte, eta aurrera" ("50 años, y adelante").