Emakumeenganako Indarkeriaren Kontrako Plataformaren kanpaina gazteengana dago zuzenduta, bereziki, eta helburua da indarkeriaren jatorria aztertu, erlazio sexistak baztertu eta harreman duinak bultzatzea.
Ekintzak
Ekainaren 25ean amaituko da kanpainaren lehenengo zatia. Azken asteotan herriko kaleetan eta tabernetan kartelak ezarri dituzte, aste bakoitzean esaldi batekin.
Jose Mari Carrerak gai honen inguruko ipuin kontaketa egin zuen hilaren 8an Biona tabernan eta hilaren 22an gauza bera egingo du Jai Zale tabernan.
Kamiseta lehiaketa
Kamiseta lehiaketa ere egin dute eta irabazlearen diseinua aurkeztu dute orain. Eneritz Iribar izan da irabazlea. Kamisetan ikus daiteke nola oiloak oilarrari esaten dion Ohartu garaiz, zu adina naiz.
Kamisetak aste honetan jarriko dituzte salgai Gazte Bulegoan, Biona Tabernan, Jai Zale tabernan eta Gaztetxean bost euroren truke. San Juanetan euren mezua kamiseta bidez kaleetan zehar ikus dadin nahi dute.
Kanpainaren bigarren zatia urrian hasi eta azaroaren 25ean amaituko da, emakumeen kontrako indarkeriaren kontrako nazioarteko egunean.