The Dirty Brothers taldeak 'Gure bidea' lan berria kaleratuko du datorren astean

Josu Olaziregik, Aitor Aginagaldek, Jokin Azpiazuk, Josu Alkortak eta Asier Salak osatzen dute taldea. Azken horrek jakinarazi digu lan berriak taldeak konposatutako sei abesti dituela. Orain arte kontzertuetan jo ez dituzten kantu berriak, hain justu ere. Baina, hainbat talderen bertsioak ere sartu gura izan dituzte. Horretarako, hainbat taldeetako musikarien kolaborazioa izan dute diskoa grabatzerakoan; tartean, Ripeko Jul, Des-kontroleko hainbat kide (Oier, Hodei eta Urtzi), Enboskada, Iskanbila eta Never Surrender. Salak taldearen hasiera gogorarazi du: "Hasieran, akustiko moduan hasi ginen bertsioak egiten, ondo pasatzeko helburu bakarrarekin. Baina, denborarekin, gero eta gehiago elkartzen ginela ikusi genuen eta gauzak serioago hartu genituen, eta maketa sinplea egitea pentsatu genuen, kontzertuetan egindako bertsioekin. Baina, azkenean arriskatzea erabaki genuen, guk egindako sei kantu sartuz. Datorren astean entzun ahal izango dugu emaitza.