Gaur egun Takolotik gora dagoen bidegurutze horrek aukera ematen du Fagorrera, Umezaintza ingurura, Arrasateko saihesbidera edo Bedoña auzora joateko, baina bidegurutzea ez dago argi seinaleztatuta. Horrez gainera, Aretxabaletatik datorren eta Arrasaten aurrera egiten duen bidegorria eten egiten da bidegurutzeko horretan.
Bada hori guztia konpondu guran, Udalak Diputazioari eskatu dio azter dezala zein den inguru hori behar den moduan egituratzeko irtenbiderik onena. Udalak uste du biribilgunea eraikitzea izango dela errazena, baina hori Diputazioak ikusi beharko du, errepide zati hori Diputazioarena delako.
Gaur azkeneko eguna
Era berean, Takolorainoko errepide zatia konpontzeko ere eskatu dio Diputazioari, egoera txarrean dagoelako, baina batez ere, “oso estua” delako. Gaur, abuztuaren 27, da Bedoñako errepidearen proiektuari alegazioak aurkezteko azkeneko eguna, eta horren harira aurkeztu du berea Arrasateko Udalak, “behin obra egiten hasiz gero, proiektua osa dezaten”.
800.000 euroko inbetsioa
Izan ere, Diputazioak 800.000 euroko inbertsioa egin behar du Bedoña auzora doan errepidea zabaltzen, eta Arrasateko Udalak uste du hori aprobetxatuta esandako lanak eta bestelako batzuk ere egin beharko lituzketela, tartean Bedoña auzorako saneamendua eta telekomunikazio zerbitzuak sartzeko hodiak ipini (hori ere aurkeztu dute alegazioan).
Diputazioaren proiektuari berari dagokionez, alegazio epea zabaltzeaz gainera, lurrak desjabetzeko proiektua ere abiarazita dauka. Bestela esanda, aurten obretan hastea zaila dela uste dute Udaleko Hirigintza Sailetik, baina “datorren urtean akaso…”.