Bizilagunek kontatu digutenez, atzo (eguena) arratsaldeko 17:30eak eta 18:30eak bitartean zirenean konturatu ziren Santa Teresa kaleko 22. zenbakiko soto batetik kea irteten zela eta su hartu zuela. Bizilagunek deituta, suhiltzaileak, ertzainak eta udaltzainak bertaratu ziren, eta orduerdi behar izan zuten sua itzaltzeko. Suhiltzaileak bertan egon dira gaur (egubakoitza) sutearen zergatia ikertzen, baina esan digute oraindik ezin dutela ezer ziurtatu. Bizilagunek ere ez dakite ondo zergatik piztu zen sutea.
Kalte larririk ez
Sutearen ondorioz, ez da eraikinean aparteko kalte materialik jazo, baina eskaileretan eta etxe osoan zehar nabariak dira sutearen arrastoak eta ke usaina.
Suhiltzaileek adineko emakume bat atera behar izan zuten 5. solairutik, eta ospitalera eraman behar izan zuten badaezpada, baina ezer larririk ez duela aiderazi dute. Udaltzain bat ere larrialdi zerbitzuetara eraman behar izan zuten kea arnasteagatik baina kasu honetan ere ez zen ezer larria izan. Hanbat bizilagunek baina, beldurra pasa zutela adierazi digute.
Gaua etxetik kanpo
Santa Teresako 22. zenbakidun eraikinean 10 etxebizitza daude, eta sutearen ondorioz, bizilagun guztiek etxetik kanpo eman behar izan dute gaua, batzuk senitartekoen etxeetan, eta hamahiruk udalak eskainitako hotelean.
Goizean ekin diote kalteak konpontzeari, eta ura eta argia berriz jarrita bizilagunek gaur (egubakoitza) gaua etxean ematea espero da.