Harreman GKEa eta Arrasate Bizirik ostalarien elkartea izan dira ekimenaren sustatzaileak, eta oso gustura agertu dira zapatuan ekimenak izandako erantzunarekin. ''Balorazio oso positiboa egiten dugu, jende asko etorri zen ekimen honetan parte hartzera'' azaldu digu Monte tabernako Juan carlos Davilak.
Bi gune nagusi
Pintxo poteoa bi lekutan burutu zen: batetik Biteri plazan, eta bestetik Arrasate Bizirik barruan dauden tabernetan. Lehenengoan batutako diru guztia zuzenean Haitirako izango da; tabernetan, aldiz, saldutako botila bakoitzeko euro bat bideratuko dute Haitira bidaltzeko.
Biteri plazan gainera, puzgarriak ere jarri zituzten, eta gaztetxoek ilara handiak sortu zituzten berauetan ibili ahal izateko.
Oraindik ere zehazki zenbat diru batu duten jakin ez arren, Juan Carlos Davilak azaldu digu diru asko jaso zutela eta berau Mesedeetako mojen bidez bideratuko dutela Haitira. Asmoa da diru horrekin han, kalean bizi diren umeei laguntzea.