Sergio Garcia oñatiarra gizonezkoetan, eta Aitziber Urkiola eibartarra, emakumezkoetan, gailendu ziren atzo iluntzean jokatutako II. Gaueko Tafyd krosean.
Sergio Garciak 18 minutu eta 35 segundo behar izan zituen lasterketaren 6 kilometroak egiteko. Aitziber Urkiolak, berriz, 23 minutu eta 43 segundu. Era berean, Luis Dehesa (20:22) eta Marije Velasco (26:11) izan ziren azkarrenak beteranoetan.
Abiadura bizia
Lasterketa Ferixalekuan hasi zen, 20:00etan eta hasiera-hasieratik erritmoa gogorra izan zen. Sei kilometro ez dira asko eta horrek markatu zuen neurri baten lasterketaren abiadura. Sergio Garciak berak aitortu zuen uste zuela lehenengo itzulia "apur bat motelagoa" izango zela. Baina, esan bezala, erritmoa bizia izan zen hasierako metroetatik.
Ibilbidea erdiguneko kaleetan barrena izan zen eta bi kilometroko hiru itzulik osatu zuten lasterketa. Hain justu, ibilbidea erdiguneko kaleetan barrena izateak badu bere berezitasuna; ibilbidea bihurgunetsu bilakatzen dela, eta hainbat korrikalarik azpimarratu zuten hori amaieran. Aitziber Urkiolak, esaterako, zera esan zuen: "Bihurgune askoko lasterketa izan da, apur bat arraroa, baina polita".
Antolatzaileak pozik
Antolatzaileei, Arzimendi ikastolari, dagokienez, oso pozik daude lasterketak izandako erantzunarekin eta datorren urtean "100 korrikalarien hesia apurtu" nahi dutela diote.