Bertaratutakoek gazta, txorizoa, urdaiazpikoa, patata erreak eta olibak aurkitu dituzte prest elkartean. Madinabeitia soinujole aretxabaletarra ere atsedenik hartu gabe aritu da gosaria alaitzen.
Euren abestiekin mezara janztera etorritako Goikobalu abesbatzako kideak ere gustura ikusi ditugu mahai inguruan.
Udalako jaiak San Esteban egunaren bezperan hasi zituzten Udalan. Auzotarren afaria egin zuten. "Giro ona izan genuen afarian", esan du Martin Uribarren auzo-alkateak. "23 nagusi eta 8 ume elkartu ginen. Madinabeitiak girotu zuen gaua".
Umeendako eskaintza
Auzotar nagusiak zeuden Udalan eguerdiko meza ondotik. Egitarauean, baina, arreta handia eskaini diete aurten umeei. Puzgarriak eta kart zirkuitua izan dituzte euren gozamenerako. "Gure aurrekontua ez da oso handia baina saiatzen gara umeendako zerbait egiten", azaldu du Uribarrenek. "Jendeak jaietan parte hartzen du eta hori oso seinale ona da".
Aramaion ere San Estebanak
Arrasateko Udala auzoan ez ezik Aramaioko Uribarren auzoan ere egin dituzte San Estebanak. Orain, hurrengo urtera arte itxaron beharko dute bi auzoetan berriz ere jaiak etorri arte.