Gertaera hilaren 9an, eguena, jazo zen. Arratsaldeko 17:10 ziren San Andres auzoan dagoen Txindoki dorreko 5. solairuan sutea piztu zenean. Balkoian piztu zen sutea eta segurtasun neurriak bermatzeko 19 etxebizitzetako bizilagunak etxeak uztera behartu zituzten Ertzaintzak eta Arrasateko udaltzaingoek. Ebakuazio lanak ez ziren oso astunak izan abuztua izanik hutsik zeuden-eta etxebizitza gehienak. Bizilagun asko etxetik kanpo zeuden eta beste asko oporretan.
Zauriturik ez
Eusko Jaurlaritzako Barne Sailak ez du argitzerik izan sutea non sortu zen. Litekeena da, baina, galdara edo garbigailu batean sortu izana. Urduritasuna izan zen nagusi auzotarren artean suhiltzaileak sutea itzali zuten arte. Arrasateko Araba kalea ere zirkulazioari itxita egon zen lanak errazteko. Ez zen zauriturik izan eta bi ordu beranduago, 19:00etarako, bizilagunak euren etxeetara itzuli ziren. Suteak kalte txikiak eragin zituen, 5. solairuko balkoitik haratago joan ez zirenak.