Hamaikakoan, aldaketak
Azkargortak aldaketak egin zituen hasierako hamaikakoan, eta amaieran adierazi zigun bezala, gauzak ez zitzaizkion uste bezala atera. Lehenengo zatian Mondrak ez zuen joko ona egin; baloiaren jabetza izan zuten arren, jokoa antolatzeko gai ez ziren izan. Lehenengo aukera garbia 25 minutuan izan zuen Iker Lopezek. Ondoren, Keixik ateratako falta baten, Muruak area barruan eskuinetik erdiratu baina inor ez zen iritsi errematea egitera.
Gola
Partiduko lehenengo gola 40.minutuan iritsi zen: Julen Herizek egin zuen. Pozak, baina, gutxi iraun zuen. Euskaldunak 45. minutuan berdindu zuen lehia falta jaurti eta alderatzea aprobetxatuta.
Aldagelatik bueltan, etxekoak hobeto kokatuta zelairatu ziren. 55. minutuan Keixik gora jaurti zuen ezker hegaletik Herizek egindako erdiratzea. Aukera polita izan zen bigarren gola egiteko.
Partidu nahasia
60.minutuan, Euskaldunako jokalariek Ekainek zelai erdian galdutako baloia aprobetxatu zuten kontraerasoan gola egiteko. Handik aurrera, partidua guztiz nahastu zen. 70.minutuan epaileak Garmendia egotzi zuen. Jokalari bat gehiagorekin, Mondrak aurrera egin zuen. Herizek ezkerretik erdiratutako baloia Iker Lopezek ukitu, baina atearen aurretik pasa zen inork sareetan sartu barik. Gero, korner baten ondoren, zutoina jo zuten etxeko mutilek. Azkenean, berriro ere Julen Herizek, berdinketaren gola egin zuen 80.minutuan. Azkeneko minutuak oso nahasia izan ziren. Epaileak Euskalduna taldeko bi eta Mondrako Illart Etxeberria egotzi zituen.
Partidu txarra
Partidu amaieran Iker Lazpiurrek esan zuen horrelako partiduak ez direla onak ez eurentzat ezta ikustera datozenentzat ere.
Partidua samurra ote zen galdetuta: "Partidu guztiak jokatu behar dira", zioen Laspiurrek. "Datorren astean Ondarrura joango gara; partidu zaila izango da, beti bezala", aurreratu du Laspiurrek.