Oskar Rekalde Bidegiko prentsa arduradunak jakinarazi duenez, errepidearen berritze lanak gabonetarako amaituko dituzte.
Obrak espero baino beranduago hasi zituzten, baina aurreikusi moduan eta atzerapenik gabe amaituko dira. Izan ere, ekainean hasi zituzten lanak eta zazpi hilabeteko epea ezarri zuten lanok amaitzeko. Eta Rekaldek adierazi duenez, "ez da ohikoa halako kasuetan, baina lanak oso ondo doaz". Azken egunetako eguraldi kaskarrak obrak geldiarazi ditu; edozelan ere, gabonetarako amaituta egongo dira, azken orduko arazo garrantzitsurik ezean.
Zarataren aurkako panelak
Gainera, aurreikusten ziren asfaltatze lanez gain zarataren aurkako panelak ere jartzen ari dira saihesbidean. Azken lan hauek, Rekaldek aditzera eman duenez, obra nagusia aprobetxatuz egin dira: "zarataren aurkako panelak ez zeuden aurreikusita, baina beharra dagoenez, asfaltatze obrak aprobetxatu ditugu panelok jartzeko".
Bestalde, obrak amaitu arte bide mozketa batzuk egingo direla gaineratu du Rekaldek. Izan ere, dioenez, "oraindik ez da modurik asmatu bide mozketarik gabe asfaltatze lanak gauzatzeko". Finean, ia gertu dago herriko zirkulaziorako hain garrantzitsua den Arrasateko saihesbidea.