EAJren Gipuzkoako Buru Batzarrak goizean jakinarazi duenez, ez dute babestuko Arrasateko PSE-EEk EAEren eta Ino Galparsoro alkatearen kontra bultzatutako zentsura mozioa. Aralarrek ere esana du ez diola babesa emango. Ezker Batuaren exekutibak esan du mozioa babestuko duela, baina Arrasateko Ezker Batuak gaur, eguaztena, hartuko du azken erabakia. PSE-EEren mozioak aurrera egiteko 11 boto behar dira. Oraingoz, aldeko bost boto ditu mozio horrek (PSEren 4 eta PPren bat).
Gaur, eguaztena, du Arrasateko Ezker Batuak asanblada PSE-EEren zentsura mozioa babestu edo ez erabakitzeko. Ezker Batuko exekutibak mozioa babesten duela esan du, baina Ander Rodriguez Arrasateko EB-Zutik koalizioko bozeramaileak Arrasate Irratiari jakinarazi dionez, bere alderdiaren estatutuen arabera herriko batzarrak du erabakitzeko eskumena, alderdiaren exekutibaren gainetik. Hala, gaurko batzarrean hartuko dute erabakia.