Lehenengoa: Arrasateko Udalak hitzartzen du Udal honetako arduradunek konpromiso garbi eta kontsekuentea hartu behar dutela printzipio hauen gainean:
- Giza duintasunaren errespetua, eta bereziki bizitzarako eskubidea izan daitezela eskubide guztien eta askatasunaren oinarri.
- Pertsona guztien giza eskubideen defentsa eta eskubide horiek errespetatu ezean, hori arbuiatzea.
- Aniztasun politiko, sozial, ideologiko eta identitarioa onartzea eta horiek bermatzea.
- Esklusiboki
bide politiko, demokratiko eta elkarrizketatuaren aldeko apustua; eta,
ondorioz, indarkeriaren erabileraren aurka agertzea eta gaitzestea,
baita indarkeria hori posizio politikoak defendatzeagatik edo prozesu
politikoak hondatzearen mehatxu egiteko erabiltzen denean ere.
Bigarrena: Arrasateko Udalak adosten du, ondorioz,
eta printzipio horien argitasunean, ETAren ekintza terroristak, bere
azken atentatu hilgarriak eta bere azken komunikatuan adierazitako
mehatxuak printzipio horiek urratzen dituztela.
Hirugarrena: Aurreko puntuekin bat ez datozen udal arduradunen dimisioa eskatzen du Arrasateko Udalak.
Alderdi Popularra
Azaldu moduan, testu hori ez da 24ko osokoan aztertuko den bakarra; PPk berea aurkeztuko du-eta. Itziar Lamarainek azaldu moduan, jeltzale eta sozialistena "kaskarregia" da eta berak "irmoago" bat aurkeztuko du. Hala ere, berretsi egin du, zentsura mozioa egitekotan, babestu egingo duela.
PPren babesa baina, jakina denez, ez da nahikoa izango testuak (eta ondorengo balizko zentsura mozioak) aurrera egiteko; EAren edota EB-Zutik koalizioaren bozkak ezinbestekoak zaizkie.
Aralarrek, bere aldetik, ohar baten bidez adierazi du hasierako mozioa ez dutela "osoki babestuko dagoen terminoetan" eta zentsura moziorik ez dutela babestuko, "eta are gutxiago era orokor batean planteatzen denean".
Eusko Alkartasuna
Gauzak horrela, bihar eguaztena, batzartuko da EAko Pello Urizar Arrasateko sozialistekin mozioa aztertzeko. Bilera horretatik erabakiko dute hasierako mozioarekin bat egingo duten edo ez. Zentsura mozioari dagokionean, Urizarrek esan du "mendeku bidez ez" dela egin behar eta gobernagarritasuna bermatu beharra dagoela.
Ezker Batua-Zutik
EB-Zutik koalizio litzateke giltza, eta momentuz, azken unera arte ez dute jakitera emango erabakia. EBren zuzendaritzak esan du mozioen alde daudela baina herriko batzarrek daukatela erabakitzeko eskubidea. Ander Rodriguez bozeramailearekin berbetan, hark esan du egina daukatela hausnarketa politikoa baina osokoan bertan jakinaraziko dutela zer egingo duten.