Zapatuan Arrasateko Amaia antzokian egingo duten ekitaldiaren berri emateko, agerraldia egin zuen atzo Portaloira Topaguneak. Bertan egon ziren Arrasateko preso politikoen hainbat senide eta baita aske utzi berri duten Natale Landa ere. Espainiako espetxe politika salatu zuten, batez ere, sakabanaketa politika.
Presoen egoera
Agerraldian Iosu Uribeetxeberria eta Gazta preso arrasatearren egoera azaldu zuten, baita Jon Agirrerena ere. Portaloira Topagunearen ustetan, Agirreren egoera, Euskal preso Politikoen Kolektiboa suntsitzeko apustuaren isla da.
Era berean, espetxe politika horrekin amaitzeko eskaria luzatu zuten.
Sinadura bilketa
Honen harira, adierazi zuten abian den sinadura bilketan 1000 sinadura inguru eta herriko hainbat talde eragileren atxikimendua jaso dutela, eta mozioaren aurkezpena ere aurrera doala.
Ekitaldia, zapatuan
Zapatuan izango da Portaloira Topaguneak antolatuta ekitaldia Amaia antzokian, eta aurretik, 18:30ean, manifestazioa egingo dute herriko plazatik abiatuta.