Jardueren artean aurkitzen dira bidezko merkataritza, te dastaketa, norberaren izena arabieraz nola den jakiteko aukera, Ankur umezurztegiaren aldeko tonbola eta antolatzaileen erakusketa. Horrez gain, aurten ere euro solidarioa eta Arizmendi ikastolako ikasleen eskutik hezkuntzaren aldeko gola egingo dute.
Ibai-arteri eskerrak
Bestalde, antolatzaileek Ibai-Arte merkataritza elkartearen laguntza eskertu gura dute. Diotenez, Ibai-Arteren laguntza barik "ezinezkoa" litzateke Ankur proiektuaren aldeko tonbola antolatzea. Iaz ere bertara zuzendu zen dirua. Umezurtz-etxe horretan 240 haur bizi dira egun eta Elkartasun Egunaren antolatzaileek adierazi dute orain "pozik" daudela: "Etorkizun itxaropentsua dute, oinarrizko beharrak asetzeaz gain, bizitza duina eraman ahal izateko hezkuntza egokia jasotzen ari dira-eta". Hain zuzen, tonbolaren zozketa izango da eguneko azken ekitaldia (20:30), Eroski Bidaiak-en eskutik. 10:00etatik izango da txartelak erosteko aukera.
Zozketaren aurretik, baina, musika, magia, dantza eta jolasak izango dira, besteak beste, Seber Altube plazan, 10:00etatik 20:00etara. Txatxilipurdik, Txikitxu dantza taldeak, Txan magoak –aurten ere ez du hutsik egingo– eta Arrasate Musikalek egin dute bat ekimenarekin.
Ekitaldien egitaraua
10:00 XII. Elkartasun Egunaren irekiera ekitaldia
11:00 Haur jolasak Txatxilipurdi elkartearen eskutik.
12:30 Arrasateko Trikitixa eskolaren eskutik erakustaldia.
13:00 Txikitxu dantza taldearen emanaldia.
17:00 Txan magoaren emanaldia.
19:30 Arrasate Musikaleko banda txikiaren emanaldia Zuzendaria: Gaizka Gaztelurrutia.
20:30 Eroski Bidaiak-en eskainitako sariaren zozketa.
Ekitaldi guztiak Seber Altube plazan izango dira.