Gure inguruan berritzailea den egitasmoa lantzen dihardu Arrasateko Udala eta maiatzari dagokion osoko bilkuran (joan den eguenean) egitasmo hori gauzatzeko aurreneko pauso publikoa eman zuten: nagusiendako jangelan aplikatu behar dituzten tarifen onespena: 4,50 euro bazkariarengatik eta 3,50 euro, berriz, afariarengatik.
Iturbide egoitzan gura dute pertsona nagusiendako jangela zerbitzua egokitu; pentsatzekoa da Abaroa berria egiten dutenean egoitzak irabaziko duen espazioan egokituko dutela.
Jangela hori ez da izango bakarrik egoitzan bizi direnendako, baizik eta laguntza beharra daukan eta bere etxean bizi den edozein nagusirendako.
Bakarrik bizitzen segitzeko aukera
Azken batean Udalak laguntasuna eman gura die bakarrik bizi diren eta zailtasunak dituzten pertsona nagusiei, bakarrik bizitzen segitu ahal dezaten. Hau da, sarri eguneroko janak prestatzeko edo errekaduak egiteko zailtasunak dituzten nagusiek erabakitzen dute bakarrik bizitzen segitu barik, egoitza batera bizitzera joatea. Bada, halakoei laguntzea da Udalaren asmoa.
Xehetasunak osokoan
Jangela horren araudia eta bestelako xehetasunak argitzea falta da orain. Hori guztia datorren osoko bilkuran landuko dutela aditzera eman dute udal iturriek, ekainari dagokion osoko bilkuran. Orduantxe eskuratuko ditugu, beraz, xehetasun guztiak.