Nerabeen nahi gabeko haurdunaldien mozioari dagokionez, alderdi sozialistak jakinarazi zuen azken hamar urteotan 18 urte azpiko nerabeen arten nahi gabeko haurdunaldi kopurua handitu egin dela. Hori horrela, proposatu zuen Arrasateko Udalak bat egin dezala Espainiako Osasun eta Kontsumo Ministerioak abiarazitako prebentzio kanpainarekin.
Mozioak, baina, ez zuen aurrera egin. Alde bozkatu zuten alderdi sozialistak, PPk, EAk, EB-Zutik koalizioak eta Aralarrek. 9 boto. Kontra bozkatu zuten, berriz, Talde Mistoko eta EAJko zinegotziek: 11 boto. Kontra bozkatu zutenen argudioa izan zen Arrasaten badela Sexologia Zerbitzua, justu halako gaiak lantzeko. Horrez gainera, ikastetxeetan prebentzioa ere lantzen dutela. Hori horrela, halako kanpainaren beharrik ez dagoela.
Palestina
Palestinaren gaineko mozioei dagokienez, berriz, eztabaida luzea eragin zuten alderdi politikoen artean. Labur esanda, Hamas-en aipamenak eragin zuen eztabaida hori. Izan ere, Aralarrek, EB-Zutik koalizioak, Eusko Alkartasunak eta Aralarrek adostutako mozioan ez zuten Hamas aipatzen. Bai, ordea, EAJk aurkeztutako mozio alternatiboan. Hain justu ere, azken alderdi horrek argudiatu zuen Israelen sarraskia kondenatzeaz gainera, Hamasen ekintza terroristak ere kondenatu behar direla. Eta besteak beste, nabarmendu zuten Nazio Batuen Erakundeak Israeli izateko eta defentsarako eskubidea aitortzen dizkiotela.
Alderdi ezkertiar abertzaleek, berriz, aditzera eman zuten gerra horretan norbait biktima bada palestinarrak direla; EAk azpimarratu zuen ez duela Hamas edo Al Fatah-ren alde berba egingo, baina bi talde horien existentziak ez duela justifikatzen Israelek egindakoa. Eta besteak beste, EB-Zutik koalizioak gogora ekarri zuen Palestinan, 21 egunean 2.500 lehergailu bota zituztela, 1.300 hildako eragin zituztela eta 5.000 zauritu.
Bozketan, alderdi ezkertiar abertzaleen artean adostutako mozioak egin zuen aurrera, aldeko 11 botorekin.