Irailaren 5ean eman zuen azken kontzertua Never Surrender taldeak. Kontzertu berezia izan zen, 108. emanaldia –zenbaki sakratua taldearendako, 108. garajean hasi baitzen guztia–, taldearendako inflexio-puntua izan zena. Izan ere, Asier Uribetxeberria –Atxi– bateria jolea Pragara joan zen orduan eta aldi baterako zuzenekorik ez ematea erabaki zuten.
Zuzenekorik ez emateak, baina, ez du geldialdia esan nahi. Eta talde arrasatearra buru belarri dabil lanean euren bigarren diskoa grabatzen. Otsaileko lehen edo bigarren astean diskoa kalean izatea espero dute, eta martxoko lehen astean jendaurrean aurkeztea.
Ondo zaindutako lana
Talde arrasatearrak ez daki zein zigiluk kaleratuko duen diskoa, eta izena ere ez dute erabaki oraindik. Banaketa atzerrian ere egiteko asmoa dute eta Espainiako zein Europako hainbat zigilutara bidali dituzte abestiak. Oraindik, baina, ezin izan dute ezer lotu.
Bigarren lan luzea asko ari dira zaintzen. Aurrerapenaren izenean aurreko diskoari jarraiki, hitzetan topikoetatik haratago joateko saiakera egin dute eta alde musikalari dagokionez bide berriei ere ekingo diete. Baina ez dute gehiago aurreratu gura izan. Hori bai, jakinarazi dutenez, "ez da sorpresarik faltako".
Emaitza ahalik eta onena izan dadin bi estudiotan grabatuko dute diskoa. Musika grabatuta dago, Arrasateko Shot! estudioan, baina ahotsak, diotenez, "lasai eta patxadaz" grabatzeko, Aretxabaletako Lazkano estudioan daude, lagun duten Asier Sala soinu teknikariarekin. Behin ahots guztiak sartuta, Shot!-era bueltatuko dira, nahasketak egiteko.