Laster ikusiko ditugu obrak Ferixaleku-Altamira inguruan. Osokoak onartutakoaren arabera, otsaila baino lehen hasi beharko dira-eta lanean. Behin hasita, urtebetean bukatuta izan beharko dituzte. Bi milioi euro pasatxoko inbertsioa egingo dute.
Bi igogailu eraiko dituzte han inguruan. Aurrenekoak lotuko du Otalora kalea Altamirara bidean dagoen Gernika pasealekuarekin. Bigarrenak lotuko du pasealekua Jose Luis Iñarra kalearekin.
Esan beharra dago, hori bai, gauzatuko duten proiektua ez dela hasierakoa. Aldaketak egin dizkiote-eta, "hobetzeko".
Kokaleku berria, ezkerrerago
Adibidez, igogailuaren kokalekua aldatu egin dute. Hasierako proiektuaren arabera, Amaia Udal Antzokiaren ondotik atera behar zen. Orain, berriz, igogailua ezkerrerago kokatzea erabaki dute, Uarkape frontoiarengandik gertuago.
Horrela, han dagoen igogailua, gaztetxean dagoena, kendu eta igogailu bakarra utziko dute erabiltzaile guztiendako.
Igogailuaren lehen zati hori iritsiko da Gernika pasealekura; eta hortik gora abiatuko den bigarren zatiaren kokagunea ere aldatu egin beharko dute, aurreneko zatiarekin bat egin dezan.
Segurtasuna eta argitasuna
Kokagunea aldatzeko hainbat arrazoi eman dituzte udal ordezkariek. Batetik, igogailua Amaia antzokiaren ondotik aterako balitz, ikastetxearen patioan egokitzapen obrak egin beharko lituzketelako. Batez ere, argiztapena eta irisgarritasuna hobetu beharko lituzkete.
Bestetik, igogailua Amaia Udal Antzokitik abiarazten bada, Gernika oinezkoen zumardiraino iritsiko da, baina ilun samarra den leku batera. Eta Uarkape frontoi ingurutik abiatzen bada, berriz, aterako da argiztapen handiagoa duen eta jende gehiago ibiltzen den leku batera, eta horrek, jakina, igogailu horren erabiltzaileen segurtasuna bermatu egiten du.
Dena den, Ferixalekuko igogailua aurrera badoa ere, Makatzenakoa bertan behera utzi dute, "hobeto aztertzeko" proiektua.