Ospitale ingurutik erdigunera joan-etorria egiteko bide berria zabalik dago: Zerrajera kalea. Horri esker, orain posible da San Andresko biribilgunetik sartu, eta erlojuaren eraikinetik Zerrajeraraino eta handik ospitale ingururaino (Nafarroa etorbidea) automobilez iristea. Bi norabidetako errepidea da zabaldu dutena. Izan ere, bukatu dituzte Zerrajera urbanizatzeko lanak.
Lanok bukatuta, errepide berriaz gainera, estreinatzeko moduan izango da, baita ere, Arrasateko jolasgune berria, Zerrajerako parke berrian eraiki dutena. Eta jakina, errepidearen bazterrean aparkalekuak ere egokitu dituzte eta horiek ere erabil daitezke dagoeneko.
Etxeak falta
Orain, beraz, Zerrajera lantegiaren orubea zena guztiz urbanizatu eta egituratuta uzteko Jaurlaritzak eraiki behar dituen etxebizitzak falta dira. 140 etxebizitza dira eraiki beharrekoak, bi bloketan, guztiak ere babes ofizialekoak. Lehiaketa uztailaren amaieran abiarazi zuen Jaurlaritzak. Asmoa da obrak urte hasieran hastea.
