Ordizia eta La Unica nagusi errugbi txapelketan

Hamasei taldek hartu zuten parte zapatuan jokoan egon zen Arrasateko Nazioarteko Zazpinako Errugbi Txapelketan: mutiletan 12 taldek, nesketan, lauk.

Mojategin jokatu ziren partiduak, eta indarra izan zen nagusi alde guztietan:  zeruan, bota zuen ekaitzaren indarra eta zelaian, jokalariena. Bertaratu zirenek ikuskizun apartaz gozatzeko aukera izan zuten.

Mutiletan, Ordizia

Mutilen kasuan, hainbeste talde izanda, launako hiru multzotan banatu zituzten. Arrasateri ez zitzaion talde erreza egokitu: Hernani, Mungiako Kakarraldo eta Ordizia izan zituen lehiakide lehen fasean. Hala, dragoiek jokatutako hiru partidetatik bakarra irabazi   zuten, Hernaniren kontrakoa hain zuzen ere, eta ez zuten lortu finalerdietara pasatzerik.

Lehenengo fasearen ostean, Bordeleko B.E.C.-ek, Donostiako Bera-Berak,Ordiziak eta Eibarrek lortu zuten finalerdietarako txartela. Donostiarrek frantziarrak mendean hartu zituzten 07-19, eta goierritarrek eibartarrak, 14-05. 

Finala beraz, Ordiziaren eta Bera-Beraren artean egon zen. Azkenean, ordiziarrek euren kasta erakutsi, eta 14-12 gailendu zitzaizkien donostiarrei.

Nesketan, La Unica

Bigarren urtez, nesken txapelketa ere egon da jokoan aurten, eta kasu honetan, Iruñako La Unicako neskentzat  izan zen garaipena. Arrasateko neskak hirugarren sailkatu ziren, jokatutako hiru partidetatik bakarra irabazi eta gero.

Sariketa, garagardo azokan

Garagardo Azokako karpan egin zuten sari banaketa, eta txapeldunez gain, talde parte-hartzaile bakoitzak oroigarri bana eraman zuen.

Jokalarien lana ere azpimarratu gura izan zuten antolatzaileek. Hala, nesketan La Unicako Agurtzane Orbegozo eta mutiletan Ordiziako Mateo Mattaruco izendatu  zituzten txapelketako jokalari onenak. Arrasatearrei dagokienez, Ander Heriz eta Irati Gallastegik sari bana jaso zuten denboraldian zehar egindako lanagatik.



ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.