Irailaren 13an, domeka, dute hitzordua arrasatearrek Arantzazura erromesaldia egiteko. Ohiturak agintzen duen moduan, Arantzazuko Amaren egunaren osteko aurrenengo domekan.
Herritar asko oinez joango dira; beste asko, berriz, autobusez. Eta aurreratu daitekeena da arrasatear dezente elkartuko direla erromesaldian; izan ere, eguaztenerako 60 lagunek izena emanda zuten autobusean joateko (09:00etan aterako da, Garibaitik).
Oinez doazenendako
Oinez joateko, berriz, Kontzezinon da hitzordua, 06:30ean. Ibilbidea honakoa da: Bedoña, Larriño, Urkulu, Urrexola eta Gesaltza. Han elkartuko dira autobusean edo auto partikularrean igo direnekin, batera egiteko bidearen azken zatia.
Arantzazura ailegatzean, zain izango dituzte frantziskotarrak, harrera egiteko (11.00). Eta 12:00etan, ohi bezala, meza nagusia entzungo dute. Haraxe joango dira arrasatear gehienak, txistulari eta dantzariek lagunduta.
Udal ordezkaritza
Eta jakina, arrasatear horien artean, herriko Udaleko ordezkaritza ere izango da; hori bai, udal gobernutik, Aralartik eta Alternatiba-Zutik koaliziotik iragarri dute ez dutela parte hartuko, orokorrean, erakundeen "laizismoa" defendatzen dutelako.