Bizkaia Etorbidetik Gorostiza auzoraino igogailuan igotzeko aukera dago orain. Igogailu berria publikoa da, beraz, edozeinek erabil dezake, ez bakarrik inguruko auzotarrek. Eta igogailura iritsi aurretik dagoen ateak sarraila duen arren, ez dago giltzarekin itxita.
Horrez gainera, momentuz 24 orduko zerbitzua ematen du. Hala jakinarazi dute Zerbitzu Sailetik: "Ikusi egin beharko dugu gero zela funtzionatzen duen, eta gero akaso, aztertu beharko dugu ordutegiren bat ipini beharra-edo, baina oraingoz, 24 orduan dabil", gaineratu dute. Zortzi lagun kabitzen dira Arrasateko lehen igogailu publikoan, kilotan, 630 kilo.
Behetik gora, zuzen
Igogailua Bizkaia Etorbideko garaje berrien barrutik doa, zerotik bederatzigarren solairura zuzenean, hau da, ez da bidean geratzen, beraz, garajeen eraikinak dituen bestelako solairuetara joateko ezin da igogailu publikoa erabili; horretarako garajeek eurek duten igogailu partikularra erabili behar da.
Solairua gehitzeko asmoa
Edozelan ere, komeni da gogora ekartzea Bizkaia Etorbideko igogailu publikoari beste solairu bat gehitzeko asmoa daukala Arrasateko Udalak. Igogailua Larragaineraino iristea da Udalaren asmoa. Egokitzapen obra hori egin ahal izateko azterketa teknikoa egiten dabiltza orain eta Obra Sailetik jakinarazitakoaren arabera, laster entregatuko dute txostena 0udaletxean. Muxibarko garajeak egin dituen enpresa berak egin du txosten hori.