Arbolapetatik 200 dantzari inguru irten ziren dantza ezberdinak dantzatuz eta jantzi dotoreak erakutsiz. Baina, ohiko dantzez gain dantza bereziagoak ikusteko aukera ere izan zen.
Dantza guztiei Arrasateko txistulari eta gaitariek jarri zieten musika. Herritarren txalo zaparradak izan ziren nagusi Seber Altubeko plazan.
Nagore Ipiña Lore Gazteak dantza taldeko kideak balorazio oso positiboa egin du. Izan ere esperotako arrera jaso baitu Lore Gazteak taldeak antolatutako ekintzak. "Aurten ekitaldi handia antolatu dugu. Urtero uztailean Monterronen egin izan dugu ekitaldia baina azken bi urtetan jende faltagatik ezin izan dugu egin. Aurten ordea, kaleko jendeari zuzenduta dagoen ekitaldi desberdina egitea pentsatu genuen".
Helburuetako bat herritarrengatik gertuago egotea izan da. Hala, egungo eta lehengo 200 bat dantzarik hartu dute parte ekitaldi jendetsuan.
Parte hartzea eta jendearen erantzuna ezin hobea izan dela azaldu du Ipiñak. Adin guztiko jendeak hartu du esku: 8-9 urte bitarteko umeetatik helduenetara bitartean. Horrela, dantza guztiak egiteko aukera izan dute.
Askotariko dantzak
Ekitaldian ohiko dantza ezagunez gain, dantza bereziagoak ikusteko aukera ere izan zen. Besteak beste, dantza nafarrak, kostaldekoak edota arabarrak. Gaztetxoenek eta helduenek herriko plaza kolorez eta alaitasunez jantzi zuten herritarren begiradapean.
Guztira, hamahiru dantza ezberdin egin zituzten: Ezpata txiki, Batelerak, banakoa, Calles, Otsagabia, Zapi txuria, Jaurrieta, sorgin-dantza, Uztai Haundia, Kataiak, Gasteizekoa eta fandangoa eta arin arina.
Uztailetik urrira bitartean ibili dira Lore Gazteak dantza taldeko kideak guztia antolatzen eta lotzen. Bi entsegu orokor egin dituzte eta koordinazio lan handiaren ostean horrenbeste esfortzuk emandako fruitua jaso zuten dantza taldeko guztiek.