Musika eta lizentziak. Internet eta deskargak. Eskubideak eta sorkuntza. Copyright ala copyleft? SGAE ala ezgae? Horiek izango dira eguenean gaztetxean hizpide izango diren kontzeptuetako batzuk.
Izan ere, Gazte bulegoak musika librearen gaineko mahai ingurua antolatu du. Datorren eguenean izango da, hilak 10, 18:00etan hasita. Gonbita herriko musikariei egin zaie eta besteak beste, Musikherria herri diskoetxeko kideak izango dira gaztetxean. Hala ere, deialdia irekia da edonorendako. Ekimenaren helburua da, Patxi Gaztelumendi Gazte bulegoko koordinatzaileak adierazi duenez, “musikak eskaintzen dituen aukerak erakutsi eta musikaren arlo ezberdinetaz eztabaida sustatzea”.
Entzun, ikusi eta berba egin
Gazte bulegoaren filosofiari jarraiki, izaera parte-hartzailea izango du ekimenak. Gainera, musika entzuteko eta bideo batzuk ikusteko aukera egongo da.
Orain arte teknologia berrien eta software librearen inguruko ekimenak landu dituzte, baina musika ere gertu ei dago arlo horietatik. Eztabaida bizia dago gaiaren inguruan, eta ziur ekarpen aberasgarriak egingo direla.