MUk uko egin dio EBAra igotzeari, ez duelako babes nahikorik jaso

MUk ez du datorren denboraldian EBAn jokatuko. Kategoria horretan jokatuko duten taldeek gaur eman dute izena, eta dagoeneko aurkeztu dituzte berme ekonomikoak. Hala, Debagoienak ez du merezi kategoria horretan ordezkaririk, txartela eskuan izanda ere klubak ez duelako babesik jaso. Zuzendaritzako kideak han eta hemen ibili dira EBAn jokatzeko gutxienez behar zituzten 70.000 euroen bila, baina 'Asteleheneko Goienkaria'-n orain dela bi aste aurreratu moduan, instituzioek eta enpresek ez dute interesik erakutsi.

Aldaketak izango dira

Irailetik aurrera aldaketa nahikotxo izango dira. "Beterano batzuek taldea utziko dute, baina espero dut aurten protagonismoa izan duten gazteek gurekin jarraitzea", adierazi du Jon Basurkok. Izan ere, Antxon Hernandez eta Imanol Zeziaga jokalariak gertutik jarraitu ditu EBAn dabilen Azpeitiko taldeak. Eta, ikusi egin beharko da Iñaki Merinok ere klubean jarraitzen duen, MUrekin egindako lan onari esker hainbat eskaintza izan dituelako. 

Bestalde, aurrera begira, baliteke EBAn jokatzea merkeago izatea: "Hemengo multzoan Galiziako talde mordoa daude, eta horrek garestitzen du kategoria. Proposamena egin dute multzo hori bitan banatzeko, eta federazioak datozen denboraldietan hausnartuko du horren gainean". Horretarako, baina, aurten egin den lan bera errepikatu beharko litzateke kantxetan: "Harrobitik badatoz jokalariak, eta Bergarako eta Oñatiko taldeak ere suspertzen ari dira; ea bospasei urte barru ibarrean talde bat goiko kategorian izan dezakegun".

Arrigorriagan txapeldun

Hain zuzen, harrobiarekin egiten dabiltzan lanaren emaitza da joan den astean infantilek Arrigorriagako txapelketa irabazi zutela. Finalean, Arrasatekoek 67-55 irabazi zioten Euskadiko txapeldunorde izan den Loiolari.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.