Mondragon Unibertsitateko Eskola Politeknikoak ikerketaren alorrean apustu berria egin du eta mikrofabrikaziorako laborategi berriak inauguratu ditu Garaia Berrikuntza Zentroan.
Laborategiok estatuan beste inork ez dituen ekipoak erabiliko dituzte, eta horietako bat lehenengoa da Europa mailan. Bere alorrean, beraz, Europako ikerketaren erreferente bihurtuko dira.
Inaugurazio ekitaldian Eskola Politeknikoko arduradunek argi utzi dute teknologia berriak eta ikerketa alorra izan direla MUren helburu nagusia eta aurrerantzean ere horrela izango dela.
Inaugurazio ekitaldian Eusko Jaurlaritzako Industria Sailburua eta Unibertsitate eta Ikerketa sailburua, MCCko lehendakaria eta MUko errektorea izan dira, besteak beste. Guztiek azpimarratu dute industria eta ikerketa alorrean Mondragon Unibertsitateak egindako ibilbide bikaina.
Inbertsioa
Inauguratu berri diren laborategi hauek eraikitzeko 1,8 milioi euroko inbertsioa egin da eta horietan 120 pertsonek osaturiko bi taldek lan egingo dute fabrikazio teknologiak ikertzen. Bi ikerketa ildo estrategiko jarraituko dituzte; materialen konformaziorako prozesu aurreratuak eta errendimendu handiko mekanizazio prozesuak.