Aurtengo hauteskundeak baino lehenago, baina, 2003tik hona, Udal Gobernuak egindakoen kritika zorrotza egin zuen Ezker Abertzaleak agerraldian.
Francoren garaietatik hona, Arrasateko Udalgintzaren historian, legealdi goibel, ilun, makur eta ezkorrena bezala kalifikatu zuten Lakuntzaren Gobernua. Noraezean ibili omen dira: ez gobernu, ez oposizio.
Gauza bakarrean asmatu dutela diote, ironiaz, Herri Anitzakoek: haien soldatak igotzen. 2003tik 2006ra %171n igo omen dituzte soldatak eta hala oposizioa indargabetzea lortu dutela diote.
Harremanak
Herriko taldeekin harremanak ezin negargarriagoak izan direla azaldu zuten: kultura txeke bidez lortutako espektakulo huts bihurtuz, kultura taldeei dirulaguntzak murriztuz…
Diote, era berean, herritarrei itxi egin zaiela udaletxea: herriko etxea. Sartzeko baimena behar dela orain eta bilkura publikoak herritar gehienak lanean dauden orduetan egiten direla.
Debagoienaren konurbanizazioa
Legealdiaren errepasoarekin jarraituz, Debagoiena Euskal Autonomia Erkidegoko laugarren konurbanizazioa bihurtzeko asmoei kritika egin zieten. Azaldu zuten Mankomunitatea erabat baztertu dutela eta interesatu zaienean Jaurlaritzaren zerbitzuan ipini dutela.
Amaitzeko, une politikora begirada zabaldu eta datozen hauteskundeetan parte hartzeko daukaten nahia azaldu zuten Herri Anitzakoek. Alderdien legea ezeztatzeko eskatu zuten.