Legarreko plan bereziak zehazten duenez, eraikin bakarrean egin beharko dituzte etxebizitzok, asko jota 24 metro garai izango dena. Eraikinak, gehienez jota, sei solairu izan beharko ditu, etxeak egiteko, sotoa eta soto azpikoa.
Jakina, legeak zehazten duena errespetatuz, garajeak eraikitzea ere aurreikusita dago Legarreko planean: gutxienez, 169.
Horrekin batera, oro har, inguruko azpiegiturak (saneamendua, argindarra, bideak…) berrituko dituzte; adibidez, beste bide bat eraikiko dute, errekaren ondoan, Legarreko urbanizazio berriak Zabalguneko (Gelma) urbanizazioarlekin lotura izan dezan.
Negozioak lekuz aldatu behar
Jakina, hori guztia egiteko bota egin beharko dute Legarre pabiloia. Beraz, oraindik han dauden enpresekin negoziatu egin beharko dituzte handik alde egiteko baldintzak. Adibidez, Elkorok jakinarazi du orain dela hiru urte hasi zirela horren gainean berba egiten, baina harrezkero ez dutela bestelako berririk izan. Aldiz, Berango, Zaldibar Errotulazioak eta AGA lantegiak bestelako kokagune batzuetara joan dira azken urteotan.
Gipuzkoa etorbidean bulebarra eta tranbia
Bestalde eta Legarre inguruan segituz, Udal Egitamu Orokorrean onartutakoaren arabera, Gipuzkoa etorbidearen zati hori oinezkoendako bilakatu gura dute, Maalako biribilguneraino. Are gehiago, alde batetik gura dute oinezkoendako bulebarra egin eta haren ondoan berdegune bat sortu, eta berdegune horretatik pasako litzateke tranbia. Juan Antonio Urdangarin Hirigintzako teknikariburuak esandakoaren arabera, tranbiaren egitasmoaren gaineko berririk ez daukate, baina, oraingoz, Udala “plan horren arabera dabil lanean". Adibide moduan, Gipuzkoa etorbidearen zati horretan egiten diharduten etxeak orain arteko eraikinak baino atzerago dabiltza egiten, esandako guztiari lekua egiteko: "Udala badabil espazioak husten hori egin ahal izateko".